剛過去嘅七月，本地汽車銷量有輕微回升，較上月多出94部，共錄得1,456部嘅紀錄。當中，日本及韓國車總數較上月僅多出12部，有710部；反觀歐洲車銷量卻較上月急升82部，達746部之多。綜觀多間汽車代理，以寶馬表現最突出，單計寶馬車系經已錄得有241部，比上月跳升咗74部之多，而平治兩月相比只微升27部，合計僅231部而已。其中，寶馬5系轉款在即，代理早前以超值價吸引買家捧場成功，整個七月合共售出94部，分別力壓平治E-Class嘅93部同C-Class嘅62部。再者，寶馬7系亦以34部嘅數量，壓倒平治S-Class嘅13部。然而，當中異軍突出會係保時捷Cayenne及寶馬Z4，佢哋分別響RV同開篷跑車級別中，以27部同22部獨領風騷。至於日本車嘅表現，豐田Corolla及Camry就來得較平穩，分別響中、小型汽車級別中勝出，而本田則靠Odyssey減價促銷，以42部嘅銷量力壓豐田Picnic嘅34部呢！