泰國
通常一家大細去泰國玩都會想去一啲Shopping以外，大中細都玩得開心嘅地方。曼谷最出名嘅有DreamWorld以及SafariWorld，布吉則有PhuketFantasea。泰國政府旅遊局每年都花唔少心機去推廣泰國，估唔到呢股精神連一個村長都有！
記者、攝影：胡慧冲
逢星期一至日出版
話說距離曼谷個多小時車程嘅一個小省分素攀（Suphanburi），呢度有位村長為咗推廣旅遊業就將自己一塊好大嘅地改變為一個遊客村，取其名「牛精村」，因為呢個省分以養水牛馳名，可以講村長之所以有今時今日，班牛朋友真係幫咗佢唔少。
呢個牛精村佔地42畝，十分有泰國農村風味，小橋、流水之餘，亦頗有教育意義，每天他們都會有不少表演項目。
所謂有教育意義其實係指呢度猶如一個古代村落，有茅屋、草屋，更有一些古代農耕工具，遊客嚟到參觀就會有「扮古人」出現，示範古人如何生活、工作，怎樣運用呢啲工具去打水、做衫，好似時光倒流一百年，以城市人嚟講，可以接觸到呢啲異國古舊文化都算係大開眼界。
一般婚禮大家見得多，但泰式婚禮就唔係人人有機會可以見到，呢度嘅工作人員每日到時到候就會奉命成親，分了男方、女方，男的聯群結隊去到女家求親，做儀式、拜堂。遊客除了可以親眼見到整個過程，更會做主婚人，為呢對新人灌水祝福，實行親身接觸外地文化。
喺芭堤雅附近每年都會有一次賽牛節，但一年只有一次，呢度就唔同，日日都有，而且重連跑數次。唔好以為牛行路好慢，原來跑起嚟都好快，全個牛精村有數十頭牛，分工合作，一啲跑、一啲表演，各展所長。
跑牛乃危險動作，觀眾只可遠觀不能參與，但坐牛車則絕對可以親歷其境。牛村地方十分大，於是乎，呢度就會有水牛車供遊客坐上去遊花園，呢度睇吓、嗰度睇吓，跟農村自然風光大接觸。
泰國唔少動物園都會有大象表演、馬騮表演、狗仔表演，但牛嘅表演，就只此一家！牛會好聽話咁做不同動作，與表演者一齊做戲，跟住重會上落樓梯，牛都識上落樓梯？當然，此牛乃經長期訓練，30分鐘表演都算新鮮熱鬧。
泰式草藥等於我哋嘅生草藥，歷史悠久，唔少具有特殊功能，好似最近泰國傳媒大力推介一種叫「Fah-Talai-Jone」嘅泰藥，話食咗可強身健肺，呢度亦有呢種藥賣，如果行到累重可以喺度嚟一個古式按摩，在大自然環境下歎一歎。
遊客參觀完呢個牛精村之後重可以去附近嘅FactoryOutletShopping，入面有Puma、Reebok等波鞋特價發售，原來呢個省分就正係有Reebok同Puma嘅鞋廠，所以就出現咗呢個Outlet囉。
簽證： 持BNO或特區護照毋須簽證。查詢：25216481（泰國領事館）
套餐： 乘泰航4日3夜住NovotelSiamSquareHotel$2,170。查詢：27700966（奧運旅行社）
貨幣： 1港元約兌5.4泰銖
網頁：
表演時間：周一至五10:30am、4:00pm 周六及日10:30am、2:00pm、4:00pm
交通：因地方偏遠，難以自己前往，故可以參加當地LocalTour。每位1,100泰銖連接送及午餐。
查詢：（66）18683501（DeltaHoliday）
電郵：