祖國公布內地居民可以用個人身份申請來港自由行後，港股似乎有運行，炒炒吓又返上嚟10400點高位，無論係藍籌股、神州股抑或係無厘頭嘅神仙股都升到冇人信，呢排喺個市最當炒嘅自然係國企股。
咁多類國企股中，最靚仔嘅仍然係鋼鐵類股份，皆因國內到處大興土木，所用嘅鋼材唔少都係國貨，令到一眾鋼鐵股今年有唔錯嘅業績。
伏勝收到料，話今個星期公布業績嘅重慶鋼鐵（1053）將會公布上市以來最靚嘅業績，重話佢哋上半年盈利會錄得倍數增長，如果個消息係堅嘅，重鋼今年PE就會跌到得番5倍左右，計番上星期五個價，雖然單一個星期嘅升幅已經有3成，但用預期PE8倍嚟睇，個價重係好抵買。當然，買唔買得過始終都要自己諗下先。
上個星期啱啱批完股嘅新確科技（1063），股價喺批股之後企得好硬淨。睇番上次批出嗰3240萬股，大多數貨都已經落咗喺強者手上，街貨一啲都唔多，所以班行家話呢隻股其實重有得諗，只要股價能企得穩喺1蚊樓上，應該好快可以升穿阻力位。
有個行家重同伏勝話，呢隻股上次批股只係做熱身，重頭戲其實重未出籠，短期內重會炒高嚟批多一次。據了解，佢哋今次再批股嘅話，隻股一定會炒高去到個三樓上，然後畀個較好嘅友情價先至夠吸引。