陳曉東、何韻詩、車婉婉和女子組合at17，前晚在九龍灣國際展貿中心出席商台節目《雲妮夜總會》戶外直播。車婉婉即場和各人玩塔羅牌，配對另一半。
車婉婉笑指東東有獸性的一面，喜歡表現自己，她說：「其實係指佢狂野，可以配麥當娜。」然後又指何韻詩可以配球星碧咸、at17的林二汶配周杰倫，盧凱彤配陳小春。
東東的舊愛張栢芝曾形容男人為野獸，對此東東說：「係囉，俾人夾硬咁講都冇辦法，我雖然有獸性，但控制得到，自己唔會擒青。」他又表示自己有份主演的台劇《倩女幽魂》，十一月會在無綫播映。
此外，何韻詩近日肩膊舊患復發，她說：「我嘅頸骨移位，重壓住神經線，已經睇咗醫生，除咗針灸，重做埋拔罐，針灸啲針插到頭頂，成身痹晒。」
採訪：王連連
攝影：陳慧安