今正日之繽紛海水魚：<br>多莉打羸MO仔靠傻冧細路今正日之繽紛海水魚：
多莉打羸MO仔靠傻冧細路
《海底奇兵》效應有幾大？只要出金魚街（通菜街）行一轉，你就會發現其影響力真係好大。雖然電影已經開始接近尾聲，但唔少人特別係小朋友，對戲中各種唔同嘅魚仔依然大感興趣，「呢條小丑魚就係MO仔呀、嗰條咪係多莉囉！」若然你也是其中一個狂熱分子就要留意，因為今期介紹戲內幾位主角和配角的真身，想帶佢哋返屋企前，不妨先來個深入了解！
我就係馬倫嘅親密戰友多莉，來自夏威夷。我最鍾意食菜，好似黃芽白、唐生菜同菠菜，食呢啲菜可以令我色澤靚啲，身形健碩啲。我屬群體魚，可以同其他海水魚一齊生活。
我就係牙醫診所水族箱入面嘅老大基哥，我個樣雖然生得威猛惡死，但其實好溫馴、活躍和合群。最鍾意四圍游和食新鮮豐年蝦仔，因為我易養，所以好多人都鍾意我㗎。
喺水族箱入面，最鍾意同氣泡玩捉迷藏，我同多莉屬同一品種，但體形無佢咁大，顏色亦無佢咁多，所以身價比佢輸蝕。我哋唯一嘅共通點，就係大家都咁鍾意食黃芽白、唐生菜同菠菜！
我叫騰雞，家鄉喺美國同巴西，所以身價都幾高。成個診所水族箱入面，我就最怕醜，所以成日匿入珊瑚。生性孤僻又唔多出聲，所以只可以同幾條同類一齊住，太多就會同佢哋打交。
我就係同MO仔最Friend嘅朋友阿Tad，我本身係一條檸檬魚，因為個嘴天生又長又尖，所以俾人叫做長嘴檸檬。喺菲律賓同印尼都有我嘅同胞，因為生性溫馴而且合群，同其他魚相處絕對無問題。
我嘅動作最慢但就最大食，我一日食嘅餐數，比起普通魚還要吃多四餐，亦因為咁，我絕對唔可以同生性兇猛嘅魚一齊生活。平時得閒無事就會勾喺珊瑚度，唔似其他魚咁活躍。
我就係最鍾意吸住水族箱塊玻璃嘅小桃，我鍾意四圍吸又鍾意四圍走。平日我只會食葵糧作為主要糧食，但最鍾意始終都係火燄蚌，我覺得住在25度水溫之中就最梳乎。
Tiffany：「我最鍾意多莉，佢好儍，成日無記性；小桃成日貼住塊玻璃，個樣好得意。」
欣欣：「多莉雖然唔係好靚，不過佢儍得嚟好搞笑！」
輝仔：「多莉儍儍哋好可愛，成身藍色好靚。」
小丑魚日誌
楓楓：「我鍾意MO仔，佢好得意又夠勇敢，我都好想養番一條。」
瑤瑤：「我最鍾意隻海龜仔，個樣好得意，顏色都好靚。」
烽仔：「隻大海龜好叻、好威，我最鍾意佢。」
我住喺菲律賓、西太平洋同澳洲一帶，喺茫茫大海中，海葵係我最好嘅保鑣。我天生有一層保護膜，所以一啲都唔怕海葵外表一條條用嚟麻痹獵物嘅刺，每逢有敵人襲擊我嘅時候，就會第一時間匿入去。
前幾日俾人捉咗去一間水族館，後來俾人買咗番屋企，以為從此可以有好生活過，點知原來嗰一刻先係噩夢嘅開始。
我嘅新居只係一個好細嘅魚缸，而且一啲裝備都無。無咗珊瑚幫我將水入面嘅亞蒙尼亞同氮氣分解，搞到啲水又渾又污糟，三餐只得沙蟲，連我最愛食嘅豐年生蝦都無。
主人落深海鹽落得唔夠，所以啲水唔夠鹹，搞到我好辛苦，得番半條命，再係咁落去，睇怕都命不久矣。