何潤東有份主演嘅日本幪面超人電影《幪面超人555》，噚日喺日本正式上映，可能因為同日開畫嘅猛片太多，例如張藝謀嘅《英雄》同常盤貴子套新片，所以何潤東同半田健人等主角，一口氣連跑多間戲院，同買飛入場嘅觀眾見面造勢。
喺銀座丸之內戲院入面，一千個座位座無虛席，聽講套戲未上映前，已經有好多觀眾訂咗首日嘅飛，現場所見，更有十幾個fans手持橫額，專程捧何潤東場。
何潤東拍完套片後，日文似乎大有進步，佢喺戲院入面就用日文同人打招呼，佢話：「大家好，我喺戲入面做Leo一角，好開心喺呢度同大家見面。」雖然何潤東比半田等二十歲都未夠嘅主角年紀大得多，但因為佢夠高又健碩，唔少人都對佢另眼相看。
特約記者森林檎東京直擊
陳慧琳（Kelly）噚日喺台北西門町舉行唱片簽名會，Kelly近排工作排得好密，因為疲勞過度嘅關係，終於捱到感冒，重聲音沙啞。由於出唔到聲為專程嚟捧場嘅歌迷做表演，Kelly感到好內疚，佢噚日重難過到喊起上嚟，佢用國語話：「我回香港後會努力，爭取檔期再回台灣見大家。」
處境劇《皆大歡喜》一班演員噚日去咗沙田出席仁愛堂義賣活動，薛家燕話《皆》劇會添食多一百集，佢話：「本嚟做一百集，但問過監製，佢話將會增加到二百集，對大家嚟講都係件喜事，唔使加人工喇，因為已經爆騷。」
許志安同方力申噚日去咗沙田一中學出席「903全運會乒乓球比賽」，方力申游水就叻，但打乒乓波就明顯唔夠安仔咁叻，原來安仔小學六年班嗰陣時，曾經同隔籬學校比賽，結果佢以二十一比十九險勝對手，攞咗一個佢認為係一生人最威嘅獎盃，安仔重覺得就算攞最受歡迎男歌手獎都無嗰次咁威呀！
