一位中大學生阿Ben係要話中文大學係一間「英語大學」，言下之意，似乎佢以為中文大學與中文中學同屬非英語教學學校嘅名稱，既然中文中學喺家長眼中、傳媒眼中（會考放榜之後）屬於二流學校，英文中學先至係一流學校，所以「中文大學」其實亦係「英文大學」，左丁山話「中文大學」唔係「英文大學」就係侮辱中大學生。
阿Ben係咪天真得咁緊要，用甚麼語言教學並不代表一流二流之分。你嘅英文電郵寫得唔錯（好過你嘅中文電郵），唔會屬於考IELTS肥佬之類，但中文大學名稱之來由係先有英文TheChineseUniversityofHongKong，中文名就爭論不休，最後錢穆先生等同意唔好為中文爭拗而拖延，就採納咗「中文大學」呢個名稱。其實Chinese有中國文化、華人、一切與中國人有關……咁嘅意義，並非「中文」兩個字可以代表晒嘅。估唔到現在就竟然有人以為中文大學就係中文中學一類也。
中大校方絕無明文規定英語為教學語言，香港大學就有規定，所以港大係「英語大學」，中大並唔係，阿Ben認為左丁山講「CUHKisnotanEnglishuniversity...misleadingandinsultingtheCUstudents！」有乜咁insulting喎，現在個別學系要求教授用英語授課，係驚現時入大學的中學生嘅英語唔夠好，畢業後出去深造做事追唔上國際水平。三十年前，啲教授驚都未驚過，用國語與普通語教書非常普遍。令人不快者係社會歧視中文中學，「中文大學」嘅個別學生竟然亦因此而堅持認為「中大」係一間Englishuniversity！