馬龍同披頓恨攞NBA總冠軍指環就恨到發燒，不惜減價投湖人；今日Battleground各組三人賽同個人技術比拼的冠軍得主，一樣可以獲得冠軍指環，雖然冇NBA咁貴重，不過都極具收藏價值。
Battleground源自美國街頭HipHop文化，所以冠軍指環的設計亦滲透HipHop特色，純銀製造，屬於HipHop界飾物大熱金屬，指環面刻有Battleground拳頭徽號，手工精美，就算當飾物戴出街都唔覺out。
講開冠軍指環，其實呢個名字喺源自美國嘅四大主打運動聯賽，喺每季嘅揭幕主場戰，每隊冠軍人馬都會舉行所謂嘅冠軍指環頒發儀式；向每個曾為爭奪貢獻過嘅球員贈送冠軍指環，指環上不但鑲有鑽石，而且更刻有球員嘅名同號數，名貴兼且好有紀念價值。啱啱同姚明嚟香港打表演賽嘅巴特爾，來季開鑼就可以返去馬刺攞個冠軍指環，唔怪得近排佢啲隊友成日叫佢做「魔戒王」喇！