十億賣身搏晒老命
Robbie巡迴騷賺5億證身價

英國男歌手RobbieWilliams早排啱啱做完佢個超盛大嘅「Escapology」巡迴演唱會，雖然佢做騷嗰陣又要唱歌，又要倒吊，搞咁多花臣好辛苦，兼且重要猛咁節食，不過佢今次都算辛苦得有價值，因為成個巡迴演唱足足為公司賺咗四千萬英鎊（約五億港元），相信佢自己都袋唔少。

老闆賺到笑
當年EMI以天文數字八千萬英鎊（約十億港元）同Robbie簽新約，大家都懷疑喺美國冇人理嘅佢，究竟會唔會成為公司嘅蝕本貨？不過今次嘅巡迴演唱會又再次證明除咗美國以外，佢係英國以至全球最受歡迎嘅巨星之一。
Robbie單係喺英國赫特福德郡克內禾夫舉行嗰三場破入場人數紀錄嘅演唱會，門票就賣咗一千一百萬英鎊（約一億四千萬港元），所有十五場演唱會嘅門票收益就有三千萬英鎊（約三億七千萬港元）。另外其餘商品銷售、贊助費、表演費同版權費等，加埋都有一千萬英鎊（約一億二千萬港元），難怪EMI老闆都話公司嗰時同Robbie簽約係明智決定。

遇舊愛緊張
而完成演唱會嘅Robbie已經身在洛杉磯歎世界，不過日前佢同老友坐架價值二十一萬英鎊（約二百六十萬港元）嘅法拉利去蒲嗰陣，竟然喺一間咖啡店撞到舊愛RachelHunter，佢哋起初有啲緊張同尷尬，不過之後都傾得幾開心。