富豪S40車系，向來深受一眾年輕用家追捧，但奈何已推出一段時間，或多或少會予人看膩之感；有見及此，廠方便決定為其推出新一代型號，以饗車迷咁話。
從相片中可以睇到，有望於明年推出嘅新一代S40，其造型與同廠現有S60及S80車系甚為相近，當中一組扁長嘅頭燈襯以闊大鬼面罩，以及一組尾燈組合，全都能將呢個特點展露出來。至於車廂布局，則由於新車仍屬研製階段，故有待廠方公布有關細節後方可作實；但一般相信，車廂布局會與現有型號相近，設備配搭全以實用為主。另外，廠方又為用家提供多個引擎配搭選擇，當中包括1.6公升（100匹）、1.8公升（120匹），同埋輸出分別為140匹、170匹及220匹嘅2.4公升型號，以滿足不同用家嘅要求。