時裝王國Joyce昨日為新代理的名牌GiulianaTeso舉行皮草展，設計師專程由意大利來港，久未露面的關之琳更是座上客。在內地成為代言人女王的之之說：「𠵱家要賺錢養老，我都好老，要積定啲穀喇！」
時裝王國Joyce昨日在中環舉行皮草品牌GiulianaTeso時裝展，久未露面的關之琳購物路過會場，亦成為座上客，更與專程由意大利來港的設計師GiulianaTeso言談甚歡。
之之透露自廣州回港，近日忙於服務社會，她說：「𠵱家幫吓微笑行動做嘢，年初去過探啲兔唇小朋友，之前又去過杭州嘅醫院探沙士病人，重去過北京小湯山醫院探望醫護人員。」
問之之為何如此熱心服務社會？她說：「我愛心氾濫呀！其實香港人太搏命搵錢，冇時間貢獻社會，我係幸福嘅人，應該支持吓。」
提到工作，之之謂現時在內地為各品牌出任代言人，貨品種類由服裝、護膚品、地板到牙膏、茶葉等五花八門，收入更勝拍電影，她說：「我唔係專注拍廣告，不過潮流興做代言人，我撞啱時機啫。」
問之之收入是否達千萬元？她說：「唔好講啦，我驚稅局追，不過內地我交足稅㗎。𠵱家要賺錢養老，我都好老，要積定啲穀喇！」為何不等待男友黃家諾養？她說：「佢還佢，我還我，我哋經濟獨立，我唔揀結婚、唔生仔女，就係鍾意自給自足。我唔會慳錢虐待自己，屋企人亦都安排好晒。」
此外，GiulianaTeso今年冬天新作，從游牧民族的自由和浪漫風格取材，用上大量矜貴皮草如俄羅斯sable、Fox和mink等，結合具東方色彩的detail，展示「Nomad-chic」浪族型格，率性瀟灑。
採訪：RitaLeung
攝影：HoKwokHo
