大市跌完一個禮拜，又升番足一個禮拜，5日跌、5日升，埋單重有進帳，恒指創出今次升市新高，收市10424，升50點，交投有125億元，雖有基金減磅，亦有新資金入市。
國企股爭持得好激烈，指數跌15點，但上升股仍有唔少。國企今次大牛市，基金同大戶贏得漂亮，現時雖有基金計賺錢數，但仍有大戶繼續扯吸，尤以大陸資金更積極。國企已進入炒供求階段，尤以同A股折讓較大的H股，更成為大戶追捧對象，QDII最快年底前推出，H股同A股價格差距勢會大為收窄。
噚日最突出嘅國企係第一拖拉機（038），上晝重企於1.2元水平，下晝有大買盤掩至，搶到1.42元高收，大升18.3%，成交8300多萬股，佔H股3.35億股的24%，掃貨場面墟冚，可以得見。一拖22號宣布中期業績，市場已預期會轉虧為盈，最重要係公司盈利有新增長點，大戶睇好，重有得去。
衝浪平台（8178）截至6月底止的首個季度雖繼續虧損，但股價不跌反升，主要是公司早前發出盈警，股民早已有心理準備，而由於非典影響所引致的低潮已過，公司經營前景又有得憧憬，股價反而有好表現。
非典對衝浪影響好大，主要係北京辦事處所有推廣和客戶會議全部推遲，集團首季約300萬元的營業額，幾乎全部由上海鵬達提供，由於公司有固定研發同營運開支，令首季出現虧損422萬元。
第2季開始，業績已有顯著改善，為學校度身訂做的應用軟件，銷售理想，現有合約已覆蓋上海和北京以外13個省市，9月新學年開始，將會進入銷售高潮，而集團研發的新產品，包括PostalServer6，亦會在下周在京舉行的LinuxWorldChina2003博覽會推出。
衝浪業務最新的發展，係在軟件附加傳送短訊的應用功能，將來用戶傳送短訊，公司就持續有收益，以現時趨勢看來，公司有機會與內地前10大的短訊服務商合作，共同進軍此一龐大市場，日後每年可提供以千萬元計的盈利，將可令衝浪成為高增長股。
郭兆誠