個市反覆一輪，都係有進帳收市，恒指升50點。全市最威嘅窩輪，頭10隻有7隻係新地Call輪，皆因新地（016）跑贏其他藍籌，收51.50元，升3.2%。
新地Call輪中，9393升116%，仙輪變化易誇張，收5.4仙。隻輪明年2月到期，係鎖定回報輪，溢價同槓桿率唔係咁易計。唔係「特種輪」嘅9740，升24%，收46.5仙，10月到期，溢價2.2%，槓桿率11.1倍。以前耐唔中推介嘅9799，收1.16元，升18%，1周升幅78%。呢隻本來係新地Call輪中最正路嘅對象，溢價雖吸引（0.2%），但槓桿率縮剩4.4倍，已失爆炸力，交投亦細，已經唔係理想對象，而且正股1周升幅12%，驚住超買會有壓力。新地Call輪，暫時咪玩住，有機會平番啲再諗。
龍虎榜排第2嘅係路勁公司輪359，由1.8仙彈上2.5仙，升幅39%，9月初夠鐘，行使價5元。正股（1098）做4.975元，隻輪輕微價外。最後隻輪會否仍有價值，屬於兩睇。如果睇好正股，乾脆買正股算數，無謂搞輪。
高寶公司輪722，收11仙，升2仙或22%，下晝停牌等待公布敏感消息，年底到期，溢價54%，槓桿率15.4倍。溢價過高，買唔過，要買嘅話，買正股實際得多，是否值得買正股自然又要睇吓公布乜東東。
章盛