新財爺唐英年上任後「大屋搬細屋」，由九龍塘約道搬去壽山村道財政司司長官邸。佢媽咪、即唐翔千夫人唐尤淑圻前晚去保良局活動，同八方講話唔會同個仔搬去新屋。
唐媽媽好似好心痛咁話：「真係大屋搬細屋，我就一定唔會搬，因為睇過幾次，間屋得三間房，淨係花園大，點住啫！以前啲孫女一人一間房，𠵱家三個女仔迫埋一間，大孫女十幾歲喇，佢哋未睇過，睇完都會哦。點分配房？咪兩公婆一間，三個孫女一間，個孫仔一間囉，益晒個孫仔囉。」
唐媽媽一向係廿四孝媽咪，財爺責任咁大，唐媽媽直言好擔心個仔，「希望佢腳頭好，呢個時勢好艱難，好大壓力。」至於如何提點兒子，佢即時話：「最緊要唔好買車。」
另外，八方睇咗中新社噚日出嗰篇題為《無錫羊尖唐氏家族走出香港新財爺》，文章指唐英年嘅家族發祥地係無錫錫山區羊尖鎮嚴家橋村，原是常州人，祖先唐荊川曾任明朝兵部侍郎；明末，唐公子嘅父親唐翔千嘅太曾祖父喺無錫嚴家橋開咗間布莊，經過多年努力，成為無錫東北鄉首富。
唐公子嘅已故祖父唐君遠曾經係上海市政協副主席，被內地視為愛國資本家，而唐媽媽唐尤淑圻更係無錫海外聯誼會嘅名譽會長。
（圖）唐媽媽（左三）同保良局主席王賜豪（右三）及一眾總理合照。
傳真︰2623-9278
電郵︰