特首噚日失驚無神走落去見地區人士，會後見記者，講嘢都有啲無厘頭。話說有位電台男記者，開工時一向鍾意着利物浦球星奧雲嘅十號球衣，身為利物浦擁躉嘅阿董對此印象深刻。
噚日佢一見呢位記者身上着咗一件意大利球隊嘅球衣，脫口而出問佢點解唔着奧雲件衫，跟住又「叮」一聲諗起另一樣嘢：「利物浦今個禮拜對車路士，好難打呀！」
阿董一向避記者如避蛇蠍，難得佢主動開腔講波，記者梗係打蛇隨棍上，問佢會唔會賭波。阿董話梗係唔會，加上比賽開始時佢已經瞓咗，想睇都冇得睇。八方知道呢場比賽開波時間係星期日晚十一點幾，原來號稱「7.11」嘅特首，星期日咁早搵周公。
傳真︰2623-9278
電郵︰