容祖兒前晚穿上火紅皮背心拍攝新歌MV，自言真空上陣的她不僅露出小蠻腰，更扭身大擺狂野甫士，不過祖兒獲贊助的八卡鑽石襟針因趕工未畢，故只好戴上朱義盛頂檔。
容祖兒（Joey）前晚在西貢拍攝演唱會主題曲《ShowUp》MV。駁了長髮的Joey，穿上火紅緊身露臍背心和窄皮褲，扭籮挺胸大跳勁舞。
問Joey是否真空上陣？她說：「係呀，連乳貼都冇黐。」在旁的霍紋希即說：「件衫咁厚，唔會露點㗎。」Joey又笑說：「我下面唔係真空㗎，着咗條超低腰底褲。」
Joey胸前掛上一個JY字樣的襟針，但原來只是朱義盛，並非真鑽。其實Joey於十月舉行的個唱已獲一珠寶公司贊助鑽飾，本來她會佩戴一枚鑲上三百多顆鑽石的八卡襟針拍MV，惜因鑽飾趕工未畢，故此才戴朱義盛頂上，她更透露在個唱中會戴鑽石bra亮相。Joey笑說：「好多人自薦幫我喺演唱會換衫，甩一粒鑽石嘅話，佢哋可以執番。」
對於早前有人因佩戴隱形胸圍致皮膚敏感，問Joey有否試過？她說：「我乜都試過，但我冇事囉，我啲皮韌過晒你哋啦，我係奀皮妹。」此外，有報道指英皇歌手遭無綫封殺，Joey說：「真係封殺我哋嘅話，《美麗在望》都變咗《美麗無望》啦，我就唔擔心囉。」
採訪、攝影：駱華齡
