今時今日大家走出油尖旺，街邊魚蛋嘅地位依然屹立不倒。唯一有變的，是街邊小食款式已經多不勝數，甚至有些「小食」係大家估都估唔到可以企喺街邊食嘅。講多無謂行動最實際，一於走出鬧市，食遍街頭巷尾嘅港式風味小吃啦……
第1站
深夜時段，想食魚蝦蟹未必要上酒樓食肆，旺角好景商場對面一間街邊小食亭，門面已經擺放咗幾碟海鮮，有鹽焗龍蝦、生猛咖啡蟹等。店舖負責人林先生話，利用海鮮美食做Gimmick，是希望可以擴闊街邊小食嘅「框框」，從而給食客有更多選擇。
「唔同海鮮嘅入口國家都唔同，有加拿大、法國、澳洲、泰國等。開業有三個多月，暫時最好賣都係鹽焗龍蝦，每日平均可以出售20多隻。」午夜過後，林生重會放幾張枱椅在街邊，方便客人大擦海鮮。
338海鮮小食
地址：旺角登打士街55號地下
電話：23842898
營業時間：12:00nn-3:00am
第2站
鑽出好景商場後，見到一間專賣日本小吃「章魚小丸子」嘅舖頭。章魚小丸子好味嘅地方，係燒烤汁的味道夠晒濃厚，而小丸子裏面嘅章魚夠晒大粒，一碟12蚊有6粒，兩個人分就啱啱好！
章魚小丸子
地址：旺角登打士街43S號
電話：96870098
營業時間：1:00pm-11:30pm（假日會延長）
第3站
行到山東街見到一間專做泰國串燒小食嘅舖頭，揀咗一件「蘿蔔皮蛋」試吓，好彈牙！由於無加味精，燒烤後更覺香味四溢，蛋黃新鮮，絕對係飯後小吃嘅好選擇！
大曼谷泰式串燒
地址：通菜街39號A1A舖
營業時間：12:00nn-1:30am
第4站
沿着山東街轉出「波鞋街」，行到接近奶路臣街時，飛奔跑去買了一包椒鹽魷魚，每條魷魚都香噴噴脆卜卜，魷魚煙煙韌韌，充滿椒鹽味就更加易入口。
168美味小食
地址：旺角奶路臣街17號地下
營業時間：1:00pm-2:30am
第5站
先達廣場樓下一間「燈火通明」嘅舖頭，賣嘅冷盤鹵味小食就十足似七、八十年代舊香港街邊車仔檔嘅模樣，於是叫了一串鮮魷魚及牛𦟌細味一番，食前蘸點芥末或醬汁，又有另一番滋味。
文記菓汁食品
地址：旺角亞皆老街83號地下（先達廣場樓下）
營業時間：11:00am-5:00am
第6站
到了太子嘅小巴站又有一間小食亭，其另類小食「潮州煎薄餅」就很不錯呢，雖然薄薄一片，又沒有香脆感，但勝在餡料豐富，肉鬆有質感。
時興菓汁美食坊
地址：太子弼街60號B舖
營業時間：4:30pm-7:00am
