「哥頓」胡應湘近年刻意栽培細仔「小哥頓」胡文新，最近升咗佢做合和實業董事副總經理，小哥頓其實份人好文靜，唔似佢老竇咁多嘢講，不過近日老竇俾港珠澳大橋問題困擾，佢冇理由唔做番啲嘢。噚日佢就好沙膽，竟然去咗同老竇舌戰嘅霍建寧旗下嘅新城電台踩場，真係唔講得笑。
其實，小哥頓係去新城接受訪問，不過訪問中就冇提大橋問題，只係講吓合和最近分拆上市嘅合和公路情況。會後八方自然唔放過機會，問佢點睇長江基建李澤鉅想同合和爭建大橋，佢話唔覺得對方出爾反爾，但雙方能否合作就言之尚早。話晒小超人做過合和董事，大家一場朋友，胡文新咁講都算畀面對方。
（圖）胡文新接受訪問時，冇提及大橋問題。
傳真︰2623-9278
電郵︰