黎文卓自資出版《左一句、右一句——香港三字經啟示》，內容極之惹笑，夠晒趣味性，附上佢自己嘅書法（有功夫㗎），七彩中國式漫畫，睇嚟橋王黎為免失業燒炭，呢次係落足心機，落足本錢工夫。
隨手揭開一睇，第五十六頁嘅插圖係：「唔想衰，埋大堆」，副題係：「古來聖賢皆寂寞，夠腳開枱最快樂。」正文有解釋：「君不見黃河之水天下來，跟住大隊唔使發呆；君不見高堂明鏡悲白髮，皆因有鞋唔識擦；古來聖賢皆寂寞，夠腳開枱最快樂。」後文意思係：「團結就是力量，出外靠朋友，守望相助，切忌獨斷獨行。」
香港俗語，有時非常傳神，繙譯成為書面語、普通話，就失晒神韻咯。唔識廣東話，睇呢本黎文卓「幾吋作品」，難度甚高，本地人應該識得欣賞，亦可從經文中咀嚼做人道理，千祈咪嫌棄黎文卓粗鄙。譬如做人要知足，唔好下下人比人，會比死人，隔籬阿尊阿積買新車，揚威耀武，係唔係要學呢？非也，黎文卓教落：「唔夠班、執二攤」！「人貴有自知之明，菜貴因有非典型；冇錢唔一定要醒，一百蚊都係人情；明明你係朱義盛，就咪當係劉嘉玲；明明住響九龍城，就咪話住紫禁城；做唔到華仔黎明，都可以做路人甲乙丙！」嗱，呢句夠晒精警，做人唔係一定做阿一嘅。一則到課堂?公司之內有一個肥佬黎型人物出現，自己就要做阿二，冇謂強出頭，咁至唔會傷害元氣㗎。