海外車訊：
新版雷諾Espace享受至高

雷諾汽車（Renault）近年狀態大勇，先後為旗下車款如Megane、Laguna等等推出新一代型號，無不備受車迷歡迎；而走大型MPV路線嘅Espace，廠方亦於早前為其推出新一代版本，兼且重有大幅度嘅改良㖭！據聞香港車迷快將有機會與其見面，不如今日一齊嚟先睹為快，睇睇新車有何吸引力啦！
記者：鄭達基

造型年輕富活力感
從外形而言，新一代雷諾Espace摒棄咗舊有型號一份成熟穩重嘅形態，取而代之會係變得極富年輕活力感；不但車身線條變得圓渾流暢，就連一組較前有更高照明度嘅頭燈組合，亦能令車子增添一份朝氣。而開啟幅度甚大嘅車門，配合低地台設計，乘客上落亦見方便容易得多。

車廂寬敞設備齊全
用家選擇大型MPV最着重嘅一環，相信一定係要新車有寬敞闊落嘅車廂空間莫屬，而新款雷諾Espace亦備有以上優點；然而，車內三排座椅除擁有十足承托力外，更可按需要收摺放平以增加載物容量，又或者係營造出一個更舒適嘅乘車環境。不過，最惹人注目相信會係天幕式車頂設計，絕能予人更多親近大自然嘅機會，配合齊全嘅設備配搭，享受倍見愜意呢！

3.5V6偈輸出強橫
一如以往，雷諾廠方為選擇新一代Espace嘅用家，提供有三台電油及三台柴油引擎作選擇，當中頂級版所配用嘅一台3.5V6偈，不但運轉寧靜又慳油之餘，而其245匹強勁動力輸出，更教人對其留有深刻印象；另外，新車底盤結構亦曾作改良，其中由前輪麥花臣支柱及後輪扭力連桿組成嘅懸掛系統，亦見柔韌富支持力㗎！