食消夜，通常第一時間都會諗起自助火鍋，貪佢經濟又實惠。其實要食好嘢唔一定淨係得呢味，和風美食、泰式辛辣、台灣小吃，甚至近年興起嘅私房菜都紛紛趕上潮流，變成「夜舖」一族。今次特別搜羅了幾個國家美食，價錢大眾化又抵食包飽肚，果然係「愈夜愈精采」。
這間於今年2月始開業的川菜食府，特別為嗜辣者提供一處「辣味鬥一番」的空間。這兒的麻辣四川湯底陣容鼎盛，$80就有一鍋湯底，材料有貴州椒、大蒜、花椒八角、子彈椒、香葉等，師傅表示湯底每日都要熬兩小時才入味。此外，地道川菜菜式都應有盡有，好似一系列嘅「水煮美食」、辣子霸王雞、酸辣涼粉等。入夜後想食四川菜，這裏當然是至佳首選！但由於晚市生意經常爆棚，所以食前最好打電話訂位。
食川菜前的一道涼伴前盤，酸酸辣辣嘅涼粉爽口多汁，為麻辣火鍋作好最佳準備。
用上「淨咗身」嘅香雞令肉質更覺滑嫩，再配以大廚特製嘅熬汁，塗上紅酒及麻酒後，香味濃郁，係嘗四川菜必定Order的冷盤。
Jess：「我一向都食得辣，呢度用嘅湯底份量已經唔係好辣㗎喇！香港人應該會接受到。」
滿江紅川麵火鍋館
地址：銅鑼灣軒尼詩道482號泰港大廈一樓
電話：28388811
營業時間：11:30am-4:30am
以半價就可以食到𩶘魚刺身的確係「魅力沒法擋」！銅鑼灣一間日本料理，踏入10點半後的消夜時段推出特價優惠益食家，好似原價$68嘅魚湯蟹鍋，消夜時段只賣$38一鍋。負責人曹惠炳話，由於晚市需求大，所以決定以平價和風美食吸引食客，反應不俗。他推介最抵食嘅𩶘魚刺身，一條都係賣$88，而且上枱時重好生猛新鮮㖭！
兩食嘅𩶘魚刺身，食完刺身後，重可以煲埋條魚，整番碗魚湯㖭。
壽司卷有不同味道，如GIGI卷、龍卷、爆炸卷，都係用上新鮮牛肉果、鰻魚、三文魚等刺身美食炮製而成。
曹生話佢哋用「三點蟹」來煲蟹粥，因為咁先至最入味。試過後發覺味道啱啱好，食到唔停得手。
水車館日本料理
地址：銅鑼灣駱克道393號地下
電話：28382260
營業時間：6:00pm-5:00am
*以上價錢適用於10:30pm後
要食真正嘅台灣菜，可以到這間剛開業嘅「狀元樓」。「狀元樓」內部裝修莊麗堂皇，負責人Shirley表示，餐廳希望可以吸引一班想靜靜哋食嘢嘅顧客。而以「狀元」命名，是希望能做到每碟皆為極品！餐廳菜式以樸素台南高山菜為主，味道較濃味，菜式較精細，味道配搭則多以醬汁來凸顯菜式原味。
看似一堆魷魚絲般，但入口後卻出奇地迷上癮，不知不覺已嘗了半碟！亦是佐酒嘅最佳菜式。
一道傳統嘅台灣高山人的甜品之一，橙得通透，飯後甜品首選。
狀元樓臺菜
地址：銅鑼灣謝斐道477號
電話：28919833
營業時間：
11:00nn-3:00pm
6:00pm-1:00am
一班來自泰國烏汶府部族嘅泰國人，最近開了一間正宗東北泰國菜菜館，菜館由廚房到樓面都係清一色泰國人。嚟咗香港18年嘅老闆娘鄭小姐話，今晚係英超聯開鑼，所以已經安裝咗電視機。「香港食客多數都會揀有波睇嘅餐廳，所以我哋都要迎合港人嘅新口味！」
青檸酸汁中和出來的泰式醬味濃郁，配以泰式地道美食生大蝦，非常惹味。
用生木瓜切絲，加入鹹蟹、蝦米、辣椒、豆角、番茄及花生米，撈揉而成的一道沙律菜式，清清淡淡順便洗吓個腸胃！
Somggin：「我最鍾意食呢度嘅辣椒生大蝦，酸酸辣辣嘅味道最易入味。」
好味道泰式美食
地址：銅鑼灣駱克道401-403號地下
電話：25736380
營業時間：11:30am-5:00am
*以上價錢適用於12:00mn後
消夜時段想食籠點心，最緊要當然係熱烘烘啦！天后有一間開咗接近8年嘅點心舖頭，每籠點心都係劃一收費$10一籠，重要係24小時不停蒸籠、不斷運作，而點心更好味到連明星如何韻詩都漏夜來幫襯。負責人Candy重話平均日銷兩萬籠點心，認真厲害！
呢兩款芋泥系列係食店最多人Order的點心，雪糕蒸發出來的味道很香滑，重唔趁快試？
嘴兒甜點心(銅鑼灣店)
地址：天后銅鑼灣道96號地舖(中華遊樂會對面)
電話：28061629
營業時間：24小時營業
食私房菜已經不是「達官貴人」的飲食文化。尖沙嘴新開一間私房菜館，食店環境甚具鄉土情懷，好似許願樹、酸枝傢俬等，重有紫微斗數及塔羅牌大師幫你「趨吉避凶，指點迷津」，可謂別具特色。菜館每逢周末都會延長營業時間，菜譜經濟抵食，$250已包晒四個頭盤、六道主菜、一湯一甜品。兩位起，須兩日前預訂。
思家菜
地址：尖沙嘴棉登徑8號3及4舖
電話：28655998
營業時間：6:30pm-12:30am
備註：塔羅牌逢星期一晚上八時開始進行，由Iris主持。而紫微斗數大師天翼則逢星期四駐場，須電話預約。
