早排掀起旋風熱潮嘅西班牙足球勁旅皇家馬德里，來港踢表演賽，全城哄動。甚具市場觸角嘅發展商，即刻食住呢個市場焦點，整賣樓優惠之餘，重整咗個以皇家馬德里為主題嘅示範單位。九倉深井碧堤半島，就係一例。
不過，聽賣樓主帥黃光耀講，示範單位開放冇耐，裏面擺放嘅皇馬珍品，俾人「撻」晒。例如皇馬標誌球衣、鎖匙扣，足球精品等等，都俾參觀者順手牽羊。
真係估唔到香港球迷瘋狂程度，唔單止通宵買「波飛」咁簡單，連小小擺設都唔放過。
其實，發展商早就料到紀念品好搶手，加派保安人員昅到實，奈何球迷嘅熱情實在太犀利，任何有關皇馬嘅嘢唔會走雞。雖然話啲紀念品好靚，人人都想要，但都唔可以貪就手。
青衣灝景灣（圖二）有個單位，上個月尾俾買家撻定賣唔成，前日再放盤。
撻過定嘅單位，通常要花多啲時間，叫價又要低啲先至賣得出。呢個單位就啱啱相反，放咗唔夠一日就搞掂，個價重同之前一樣。
業主都算因禍得福，原本諗住要賣平啲，最後無端端賺咗筆撻定定金，唔使平賣，重有成六萬幾落袋。雖然其間要搞嘅手續，花嘅時間多咗，但計落都算有賺。
中原黃國強話畀蘭西知，之前個買家唔係因為後悔買貴樓而撻定，只不過係私人財務問題，無法完成交易。
事實上，呢個三座低層C，八百餘呎，兩次成交價都係二百零五萬，每呎逾二千五，比市價重要低五巴仙，好搶手㗎。
至於撻定買家就真係唔好彩，買樓唔成，重要蝕一大筆定金。
內地出現淮河洪澇及雲南地震，長江實業主席李嘉誠私人基金會，直接運米去災區，派畀啲災民。
啱啱收到料，部份已送到災民手上嘞。
李嘉誠基金會發言人講，第一批共三百四十公噸大米，由黑龍江肇源裝運，首先送到安徽阜陽。
其餘就稍後送抵安徽毫州、淮南、合肥、巢湖、宿州、蚌埠、滁洲同雲南楚雄市。
今次基金會總共送出二千一百公噸大米。
九龍塘一帶屋地，業主十居其九係名人富豪，買賣永遠都好低調。
好似噚日有代理話畀蘭西知，從來冇喺市場放過盤嘅又一村內街玉蘭路七號獨立屋，以接近四千萬賣出。
業主係歌星倫永亮家族，佢媽咪就住喺嗰度。
間屋佔地萬呎，因為冇放過盤，確實有幾大就無從稽考。不過，以嗰度地積比一倍六五計，可以起到一萬六千五百呎樓面，呎價二千四百幾蚊。
蘭西
電郵地址：
