萬人迷碧咸（DavidBeckham）同佢老婆Victoria喺日本有幾紅，唔使我羅拉多講相信大家都好清楚啦！原來佢兩公婆早排去東京出巡嗰陣，搵Victoria做代言人嘅SamanthaThavasa首飾店，特登為佢哋製作咗一批別注版碧咸夫婦情侶鑽石首飾。不嬲唔係名牌就唔上身嘅Victoria，就去到邊戴到邊咁幫手谷宣傳，難怪珠寶商嗰幾千萬港紙代言人費，都係笑住口咁畀啦。
SamanthaThavasa早排趁碧咸夫婦大駕光臨，推出一批情侶戒指同頸鏈，不過呢批首飾喺碧咸未過檔皇馬嗰陣嘅設計嚟嘅，上面重印有代表碧咸喺曼聯所着七號球衣嘅「7」字，雖然𠵱家個感覺睇嚟完全out晒，但瘋狂嘅日本fans仍然難擋碧咸夫婦嘅魔力，呢set情侶鑽戒就算賣到成三萬三港紙，依然大把人入貨！
另外，唔知Victoria係咪為新大碟鋪路，早前佢接受日本雜誌訪問時完全收起晒高傲嘅臉孔，猛話：「我唔係靚女，朋友又唔多，更加唔係身高一米八嘅model！」單憑呢副謙虛師奶嘅形象，難怪冧死咁多日本女士！