小初記得早排提過生產風扇嘅滙多利（607），原來唔驚唔覺已升上1.10元樓上，公司將於下周二公布全年業績，如無意外，呢類半新股盈利表現會好靚仔，斷估今次都唔會有意外啩？
滙多利自從上次搵傳媒睇廠到𠵱家，股價由當時唔夠1元起步，噚日已升至1.17元，但成交依然唔算多，只係300萬元。不過，日日都叫做有咁上下成交，入場之後要走亦唔太難。
經紀陳話，隻股一直都有人睇住，在上市半年期滿咗無耐，大股東亦成功減持股份。好似話搵到人幫手，所以股價拾級而上，家陣又到業績公布期，自然想趁業績靚做場好戲，一個唔該搞埋批股集資就最正。
小初上次都講過，唔明白隻股邊際利潤點解會咁高，所以仍然覺得隻股只宜投機短炒，玩一陣執些少就算數。
另外，經紀陳早前推介，小初又賺過錢嘅中國星（326），近日股價仍然企在1元樓上，唔多似有散貨意圖，睇嚟可能有後着，不妨睇實。
慕容小初