章小蕙喺香港間時裝舖日前執笠，為咗清晒舖頭啲貨尾，佢特別將啲貨尾運去台灣促銷，噚日第一日開賣，反應就非常熱烈。據知部份客人更是專程從台南、台中和高雄坐飛機嚟幫襯。
其中一位來自台南嘅客人，一次過就買咗五萬蚊港紙嘅衫，而預購嘅短短兩個小時，佢淨係做熟客就做咗二十幾萬生意。因為章小蕙今次賣衫好高調，所以台灣國稅局都派咗稅務人員到現場查數，以防章小蕙逃稅。
章小蕙噚日凌晨時分已開始為開市做好準備，事事親力親為，章小蕙又親自招呼客人，佢用國語同記者講：「在預購宣傳時，我都有在台灣媒體上試過部份的衣服，那批衣服即被客人訂購了，當中包括一件紅色的古董緊身衣服。我招呼客人時，都有特別向她們介紹哪些衣服適合她們，我做了她們的服裝指導。」
樂隊LMF噚日喺九龍灣展貿中心舉行「LMFFianlazyLive」音樂會，李燦森都重返樂隊一齊演出，而何超儀就做表演嘉賓。LMF成員之一嘅阿庭話：「我哋一陣會唱一首《WatchtheFucx》嘅歌，都會鬧政府，難得有人無能過我哋。」眾成員噚日掛住嘅證件，寫住「Godsavethestupid」，重印咗特首董建華個樣喺度，認真抵死。LMF噚晚嘅音樂會，樂迷要查袋先可以入場。
已經有五年冇出唱片嘅陳松伶，噚日終於一償心願，推出佢加盟環球之後嘅第一張唱片，由於松松好心急想知反應，所以噚日一早就同姐姐去唱片舖視察行情；唔單止咁，松松重自掏荷包買咗八張唱片送畀朋友，取其「發發發」嘅意頭，而佢家姐中午同松松飲茶嗰陣，重特登叫咗碟當紅炸子雞，希望銷量成績理想！
鄭裕玲主持嘅無綫節目《不一樣的對話》早前訪問男友呂方，噚日播咗出街，其間呂方大讚嘟嘟又叻又聰明，搞到嘟嘟好鬼死開心。當呂方談到感情問題時，就話自己對感情專一，唔會好似其他男人鍾意去滾，自己接受唔到所以唔會咁做，嘟嘟就回應一句話：「即係你接受到就會試呀？唔好喎，死人㗎喎。」嘟嘟同呂方一問一答打情罵俏，真係羨煞旁人。
