美國大停電，但港股噚日持續上升，恒指升50點，收10424，成交125億元。
滙豐（005）保持強勢，中資股亦受追捧，中外運（598）及第一拖拉機（038）午後有熱錢流入掃貨，大升10.2%及18%，成交亦分別增加至1.48億元及1.07億元。
另外，市場又傳阿董短期內會宣布中央拍板推出QDII，屆時中資唔單止可以在香港炒股，重可以透過RIETs挽救本地樓市。
不過，中石油（857）就慘啦，早前多次傳過股神畢菲特會減持，前日凌晨外電引述過時料，話股神真係減持中石油。噚日一開市，中石油股價大跌逾5%，其後中石油發表聲明，指畢菲特持股量仍係13.35%，並無減持行動，最後中石油跌幅收窄至2.13%，收報2.30元，成交6.39億元。
阿虎見到美林喺中石油作出澄清後，仍拚命沽貨。據聞有美資大行估計中石油產量難符預期，故調低其投資評級兼叫客戶出貨，所以就算冇股神減持呢單烏龍料，中石油一樣會被拋售。
高寶綠色（274）近日成交大增，股價造好，多次發表不明股價異動聲明。據聞因有董事漏報減持20萬股，所以被聯交所請佢停牌，要公司徹查漏報事件，下周一可唔可以復牌暫時亦未知。
公司上次已試過選擇性披露股價敏感資料被抽秤，今次又烏龍，唔知會點？
高寶停牌前升5.2%，報1.41元，半日成交高達1.19億元，成副整裝待發之勢，可惜出現阻滯，不過聽講復牌後會照砌。
阿虎