三點食消夜

香港確實為美食天堂，不論係貴價食品如鮑參翅肚，又或經濟抵食嘅食物，一樣令人垂涎。港人喜歡食消夜，貴有貴吃，平有平食，重有各地的風味美食任你揀！就算半夜三更一樣可以喺街上搵到美味食物！

記者：梁煒健、何善華
攝影：楊錦文、伍慶泉、陳陶鈞、周旭文
Model：Kaman、Winnie、Jess、Polly、Angel、Kappie、Emily、Cherrie（KOne）；Belle

深夜使錢
愈接近凌晨時分，除咗食消夜外，想搵地方玩吓、買吓嘢真係唔多。如果你想搵消遣，價錢又要大眾化的話，相信以下的消費熱點就啱你。

年輕服飾買三件半價
估唔到有時裝店開至凌晨時分，莫非生意難撈？原來位於銅鑼灣崇光百貨後面嘅「TwoPercent」時裝店，由於鄰近多間大酒店及酒吧，所以生意就做到凌晨1:30。TwoPercent主要做年輕人服飾，男女各半，由於近日舉行大減價行動，每件貨物均以8折發售。另外，若以原價購買，每3件貨品，不論衫、褲、鞋、襪均可獲得半價優惠。

TwoPercent
電話：25732209
地址：銅鑼灣景隆街4號地下（崇光百貨後面）
營業時間：11:00am-1:30am

卡通精品集中地
凌晨時分仍可以買到趣致可愛嘅卡通精品？是！例如米奇老鼠、小熊維尼或HelloKitty產品，全部都可以喺營業至午夜12點嘅Trendyland買得到。其實Trendyland愈開愈多，前後已有10間，其中以旺角及銅鑼灣開得最夜，家陣更有夏日大勁減，買滿$300就即扣$50㖭！

Trendyland
電話：23848213
地址：旺角西洋菜街南2J-Q號地下4號舖（兆萬中心對面）
營業時間：12:00nn-12:00am

新晉旺角飾物出口店
喺中環有兩間分店嘅彩姿精品店，最近進駐旺角。由於主要做飾物出口生意，所以售價較平，而且款式又多，例如去舞會必備的天使翼及面罩，就最受小朋友歡迎。另外，髮飾既多又平，售價比區內其他店舖低，售價由$28至$38不等。

彩姿精品店
電話：27702868
地址：旺角通菜街13號地下
營業時間：12:00nn-12:00am

旺角最大DVD店舖
旺角好似銅鑼灣一樣，愈來愈多大型嘅DVD店舖出現。正如位於亞皆老街嘅WideSight「廣視軟件專門店」，開業不足兩個月，但就係旺角區最大嘅DVD店舖。雖然上下兩層逾千呎面積，但其影碟售價非常抵，即使最新推出的電影《黑白森林》DVD碟，都係每隻$65，VCD亦只售$36一套，夠晒抵睇！

WideSight
地址：旺角亞皆老街67號地下
營業時間：10:00am-2:00am

深夜邊剪髮邊睇波
旺角嘅髮型屋真係開得夜，一般髮廊都營業至午夜12點，但呢間喺女人街有5年歷史嘅大都會髮廊，為方便附近賓館嘅遊客以及喺女人街工作嘅熟客，營業時間到凌晨2點。人人見到門口嘅老人公仔，就知佢哋仍營業。由於賭波規範化，為迎接英超聯，髮廊特別安裝Cable，顧客就可以邊剪髮邊睇波，有賽事的話，更營業至凌晨5點。收費方面，洗剪吹$118，染髮則由$150起。

大都會髮型設計
電話：27701789
地址：旺角通菜街47B號地下
營業時間：1:00pm-2:00am

50分鐘藥理足沐$180
香港人家陣追求健康，所以出現咗唔少腳底按摩中心，正如跑馬地一帶，腳底按摩中心林立，而一條景光街就有好幾間足沐中心。位於景光街嘅「怡登」保健中心，雖然附近競爭大，但由於環境較舒適高尚，收費卻與其他店舖相若。50分鐘的藥理足沐收費$180，而醫療推拿50分鐘就收$225，營業時間至凌晨兩點。

怡登足底反射保健中心
電話：25732788
地址：跑馬地景光街12號地下
營業時間：11:00am-2:00am

$25任睇任玩3小時
上漫畫室及去網吧玩對戰遊戲，都係年輕人喺凌晨時分嘅娛樂，但好少兩者兼存。位於紅磡區蕪湖街嘅「漫畫之家」，除咗有近15,000本中、日漫畫任由欣賞外，佢哋更有多部快速電腦畀客人上網對戰，收費每小時只收$12，玩足3個鐘只收$25，重包一罐汽水。雖然地方較小，但勝在五臟俱全，所以一到深夜，區內嘅年輕男女都喜歡到這裏蒲。

漫畫之家
電話：95431456
地址：紅磡蕪湖街61號閣樓（一本壽司店對面）
營業時間：3:00pm-3:00am

英超聯開鑼必爆酒吧
英超聯今晚開鑼，所以球迷一定會四出蒲吧睇波。論旺角區中最熱鬧又寬敞嘅酒吧，相信位於豉油街嘅K.K.酒吧最旺場。K.K.吧內有唔少大電視機，顧客可以喺不同嘅角度都可以睇波，而且食物水準不俗，消夜更有大量不同款式嘅小食，每碟售價由$38至$50不等。除咗有波睇，大廳中更有卡拉OK以供大家娛樂，重有女拳師同你猜枚唱K，氣氛好掂。

K.K.餐廳酒吧
電話：23887115
地址：旺角豉油街44-58號1樓
營業時間：11:00am-5:00am

太子區享受睇波樂趣
位於太子區花園街嘅138FUTURE酒吧，喺門口已見到幾個猛鬼公仔，未入去都已經嚇餐飽。喺HappyHour時段，每位$88可以任飲啤酒兼任食炸嘢小食，真係乜都抵晒！一過咗9點就冇得任飲任食嘞，但就有大把年輕女拳手同你猜枚！

138FUTURE
地址：太子花園街239號1樓（近界限街）
電話：34273344
營業時間：5:00pm-4:00am