馬時亨最近心情好靚，因為今日唐英年會返工做番財司，佢老哥可正式放假，陪細女露玲去美國東岸開學。
馬仔真係好錫兩位千金，記得去年初任局長，佢縮短假期都去英國參加女兒畢業禮。佢個大女露明今年教育碩士畢業，準備返港工作，最想照顧傷殘嘅小朋友。
至於細女，就喺英國中學會考時考到十個A*，ALevel噚日放榜，馬仔話，成績點樣都唔緊要，反正已經有大學收。八方問佢點教到啲女咁叻，呢位父親睇嚟又幾自由，佢話做家長千祈唔好畀壓力啲細路，提供好環境畀佢哋，鼓勵多啲，等佢哋自己曉得上進奮鬥就得啦。
馬仔話成日同個女講，讀書唔代表一切，死讀書、讀死書都唔好。馬仔細女喺加拿大出生，跟住父母四圍走，十二歲跟家姐去埋英國WycombeAbbeySchool寄宿，馬仔重大力推薦呢間中學。
傳真︰2623-9278
電郵︰