一向口直心快嘅滙豐銀行總經理柯清輝，噚日喺負笈哈佛短期進修前，與傳媒話別，妙語如珠。
可能適逢滙豐業績標青兼股價飆升，柯總興奮之餘，盡爆心中情，一時幻想波士頓九月十月天朗氣清，一時又話重過校園生活，絕不寫意，「分分鐘辛苦過返工」，蓋未入學已收到四本指定課本，文件又一大堆，如果有得揀，「寧願留番喺香港……」莫非柯總唔鍾意讀書？非也，「係唔捨得香港，我鍾意香港嘛……」
不過正如政府鼓吹要終身學習，所以唔讀唔得，柯總笑言自己「料唔夠……唔增值分分鐘冇得撈……」連滙豐銀行總經理都如此居安思危，一眾打工仔真係難捱。其實，酷愛打高爾夫球嘅柯清輝，深諳忙裏偷閒嘅道理，九月初開課前，會先去加拿大打一轉波，事關同學業進步比較，「球技進步重要啲」。
（圖）柯清輝將往哈佛短期進修，佢話分分鐘辛苦過返工喎。
傳真︰2623-9278
電郵︰