財務公司拖咗架新車返嚟，問經紀T有冇意思睇睇，經紀T問：「乜款呀，叫價幾多？」財務公司負責人話：「嗱，益晒你，落地三個月，基本上未用過，行咗幾百公里啫。XXY00車款，只要五十萬啫！」乜咁筍呀，經紀T舊年未加首次登記稅之前，問過呢架車嘅價錢，貴好多嘅噃，再三追問之下，財務公司一位老友先至吞吞吐吐同佢講：「新車車主喺車內野餐呀！」經紀T聽唔明，一諗，莫非車主在車內食「野戰」，好閒啫，冇嘢呀，想話殺咗佢。位財務公司老兄都算老實兼友好，話畀佢聽：「野餐即係燒炭燒烤，明白未？」經紀T當堂大叫一聲：「啋，唔要咯，唔要咯！」
左丁山聽完佢講，唔知想笑定喊，車主買架新車靚車，係快樂事，點解買完要喺入邊燒炭，唉，香港真係咁難撈。跟住郵差派信，收到署名中年失業漢黎文卓封信，橋王黎話：「希望此書可多賣幾本，否則香港可能又多一位中年失業漢燒炭。」橋王黎喺七月離開亞洲電視嘅宣傳總監職位，自言：「對別人講是另謀高就，讀吓書，實質就係失業。過去廿年，全港各大電子媒體都已做晒，嗚呼天下之大，竟無容身之地，不知是我的悲劇，還是香港傳媒的悲劇。」
黎文卓出版新書，自摸不求人，由文字、圖書、書法，到刻章、編輯、美術都自己一手包辦，可見佢多才多藝，亦知佢冇錢請專家代勞，幾傷也。至於呢本書係乜東東，聽日至講。