雖然白鴿黨前主席馬丁李柱銘「唱衰香港」嘅專利，最近已經被中聯辦副主任鄒哲開搶咗一部份，但係佢並冇抗議，最近又單人匹馬去咗新西蘭同澳洲訪問。
八方噚日問佢有乜收穫，佢話今日先至見新西蘭總理同外長，但係入境時候嘅遭遇就唔係幾好。
話說馬丁前日早上十一點飛抵新西蘭機場，落機後去做入境檢查，發覺只得一個櫃台負責處理非新西蘭護照持有人嘅入境手續，結果當然係大排長龍。
馬丁都算沉得住氣，排咗成個鐘頭後，卒之順利入咗境，但佢要求見負責人，向佢哋投訴，覺得咁樣令對外來遊客對新西蘭嘅第一個印象好差，個個櫃台都關門大吉，非常不方便。
照計人在他鄉，無謂惹事，但原來馬丁好講原則，每次返香港，如果見到同類情況，佢都會投訴。至於佢會唔會借今日嘅機會，直接同總理反映吓就唔知。
傳真︰2623-9278
電郵︰