噚日睇到新一期嘅台灣《壹週刊》，封面故事係世界鞋王蔡其瑞訪問，佢亦係本港藍籌股裕元工業嘅大股東。
八方對其中一段特別有興趣，蔡氏原來同國家前任主席江澤民關係好好。現年六十四歲嘅蔡其瑞話，江澤民任內曾多次主動到訪其工業王國，重講咗個驚人秘密畀佢聽，江澤民話喺佢有生之年，一定會阻止人民幣升值咁話喎！唔知成日嗌人民幣要升值嘅美國日本點睇呢單嘢呢？
蔡其瑞講到佢直接控制嘅台灣寶成集團有一個規定，就係蔡家嘅媳婦一律不得參與集團嘅運作，至於點解就冇詳細解釋。
有趣嘅係，八方查蔡氏族譜，蔡其瑞育有三名女兒，其中長女蔡佩君已屆二十四歲，並在集團內學習。
八方心諗，假若日後三名女兒均覓得如意郎君時，其夫婿又可唔可以入去寶成做嘢呢？
傳真︰2623-9278
電郵︰