新特蘭喺前晚聯賽盃果然畀我哋名家蘋果波神貼中成功「反底」贏波，呢場亦係領隊麥卡菲執教近半年以嚟第一場勝利。事實上麥卡菲能夠「開齋」，多少都要靠一班奇兵！好似費奧、米高格雷等上季主力球員，今季本來已被編配大冧巴球衣打入冷宮；點知上周英甲聯開鑼新特蘭就落筆打三更輸波，於是麥卡菲呢場就重召返個別昔日主力上陣，有啲向現實低頭嘅感覺！
不過贏波「功臣」就係後備入替嘅新仔基利，不過呢位二十二歲前鋒都算鬼馬，先喺八十九分鐘擺個烏龍幫對手曼斯菲特追平一比一，然後就喺補時階段入波奠勝！真係嚇到班上盤客死死吓，今次成功反底，睇怕周六主場對米禾爾，重有多劑！
本身係有料嘅，有時講嘢都可以大聲啲！好似韋斯咸前鋒干奴利咁，上周英甲聯揭幕戰突然失咗正選位畀利物浦借將美拿，就即刻走出嚟指摘領隊羅達唔識用人、對佢唔公平。結果前晚聯賽盃第一圈，真係俾佢搶返個正選位，重射入兩球㖭，呢次羅達想唔認錯都唔得囉！
原本英超聯揭幕戰係升班馬樸茨茅夫主場對維拉，前者班主文達歷重諗住贏波可過吓英超聯榜首癮。點知警方以保安為由，將伯明翰主場對熱刺提前到本港時間七點開波，「老樸」榜首夢難圓！最近英格蘭又熱到接近攝氏四十度，呢兩場波喺正中午進行，我求大俠真係戥班球員辛苦囉！
維拉領隊奧拉利放棄三十四歲老將後衞史當頓，我求大俠諗起兩個都係愛爾蘭人，而且喺國家隊合作過，但家陣史當頓都係咁先，真係欷歔。但係睇番最近啲熱身賽，維拉後防確有人滿之患，史當頓插針都插唔落，歲月催人，唔好聽講句：佢應該「死得眼閉」囉。
萬眾期待嘅英超聯喺周末揭幕，唔少球迷為攞頭彩，鍾意買兩大班霸曼聯W同阿仙奴W嘅二串一。我求大俠唔係叫人犯法，但香港馬會開出嘅標準盤賠率，真係比境外博彩公司低好多，兩隊W乘埋只係得一點四七倍，同外國公司比低咗近三成。如球迷志在參與不如小注怡情，買波膽好過。