常聽老人家說愛把生雞買回家，養肥後才劏來吃。但養奇醜無比的田雞，真是首次聽聞！入廚三、四十年的譚太，不但下廚經驗豐富，老公年輕時更在家鄉當廚，故練得一手非一般廚藝。「老公鍾意自己劏田雞，新鮮啲。」因此他們會「生歐歐」買十隻八隻田雞返屋企幫田雞沖吓涼，養幾日才吃。點解？譚太話新鮮、乾淨夾方便！
記者：吳佩璇 攝影：陳盛臣
逢星期一至三、五出版
自家養田雞這入廚獨門秘技，原來譚太已做了超過二十年！對田雞情有獨鍾，譚太說不過是為了三個子女。因為田雞夠補，多吃可強壯身體。
譚太還深信不疑的說：「鄉下有個細路仔成3歲都未識行，後來食咗田雞，就即刻識行！」食田雞行路快過人，所以譚太從小就給田雞予三名子女吃，還說：「我三個仔女都未夠一歲就識行。」家陣仔大女大，分別係廣告公司總監、工程師、會計師，譚太相信吃生猛的田雞，人都會醒啲！是以一家人每星期也吃兩、三次田雞。
因為田雞本身很污糟，譚太嫌街巿往往未徹底洗淨就劏來賣給客，所以一次過在街巿買9隻生田雞回家，然後用網網住，每朝早就開大水喉幫田雞沖身，到要吃時才劏兩、三隻。而且養田雞原來毋須餵食，也不會餓親。譚太話：「養成個月都唔會死！」加上譚生年輕時曾當廚，喜歡自己劏田雞多過假手於人。
田雞可以煲粥、焗飯或加配料做小炒。而簡簡單單的田雞炒西芹，就是譚太的至愛吃法。尤其是夏天，清炒比較易入口，西芹的甘香亦能配襯出田雞的鮮甜。而且譚生跟譚太年事漸高，其他高脂及難𡁻的肉食都不適合他們，田雞絕對是不錯的選擇。
用咩料：
田雞 4隻（淨肉）
西芹 半斤
洋葱 半個
紅蘿蔔絲 半碗
葱 少許
醃料：
生粉 1茶匙
薑 6-7片
蒜茸 1茶匙
生抽 1茶匙
油 1茶匙
胡椒粉 半茶匙
鹽 1/4茶匙
燒酒 2茶匙
好易煮：
1 用醃料先把田雞醃約20分鐘。西芹洗淨切段，加鹽炒好兜起。
2 田雞炒熟，灒酒及加少許鹽調味。西芹回鑊，加入洋葱等配料兜勻即成。
1.每次買幾隻田雞，譚太就會將牠們養在網內。
2.每朝早將成網田雞放喺水喉下沖身，確保清潔衞生。
3.想劏邊隻就先用刀往田雞的頭上扑落，然後斬田雞頭，由頸處將整隻田雞的外皮撕破。
4.再切去手腳和內臟，將田雞肉洗淨、斬件便可烹調。
揀田雞小貼士：
－愈生猛、愈紮紮跳就愈好。
－唔好買肚腩大的田雞，因為可能是灌水灌肥，劏落實質冇肉食，亦避免被呃秤。
除了田雞，譚太一家的另一至愛就是鱔魚，特別是兩個仔，都愛鱔魚夠滑溜。說到烹調法，一般家庭可只將鱔魚切片來炒，但譚太自從飲宴時吃過蟠龍鱔後，便被其賣相吸引，於是不停鑽研，在家也做出蟠龍效果。要知道出街食鱔價錢偏貴，譚太就是鍾意自己煮夠經濟，且做出酒樓賣相。
用咩料：
鱔魚 1條（約斤半）
蒜茸 2粒
薑茸 1茶匙
葱粒 適量
豆豉 2茶匙
胡椒粉 少許
好易煮：
1 鱔魚洗淨刮去潺，切去魚頭，然後將魚切片，但不要切到底，切完後整條魚還是連着的，然後撲上豆粉。
2 用一圓碟，將鱔魚繞圈上碟。
3 蒜茸、薑茸、葱粒、豆豉及胡椒粉撈勻，鋪在鱔魚上，隔水蒸約10分鐘即成。
