小初呢排跟潮流，學炒低PE有息派嘅工業股，成績相當令人滿意，雖然唔少工業股升幅驚人，但小初有賭徒性格愛冒險，唔怕高風險。
經紀陳見小初咁爛賭，於是推介咗一隻高風險，但可能高回報嘅股仔畀小初，就係天地數碼（500）。
小初記得，天地數碼喺2000年科技股泡沫未爆破之前，曾經炒得好驚人，股價好似上過17元水平，高位重好似搞過批股，但今年隻股就算有異動，股價亦升唔破1元，早兩年高位摸貨嘅投資者，要望見家鄉真係有排等。
經紀陳話，天地數碼經營嘅電子數碼傳送業務，將受惠於大陸在3年內實行嘅數碼電視普及化計劃，所以有機會扭轉以往業績鋪鋪蝕錢嘅情況。
天地數碼要賺錢重要等多陣，但股價已見先行，成班幫手嘅陣勢亦似模似樣，過去1個月，股價由0.80元水平起步，噚日再升2.1%，收0.96元。經紀陳話，人哋有排至望見家鄉，所以股價再抽上機會唔低。
慕容小初