蒲咗元朗幾十年嘅食神梁文韜說，雖然元朗大多數食肆規模唔算大，不過確實卧虎藏龍，好似呢間南美燒烤餐廳，就有一位曾喺南美住咗十幾年嘅顧問，憑喺當地燒烤餐館工作嘅經驗，再同本地大廚合力研究出富南美地道風味，又啱港人胃口嘅南美燒烤，就連食神食過都讚好。怪不得有食客專程由尖沙嘴入嚟幫襯啦！
記者：馬慶武 攝影：伍慶泉
Model：Chinsky(Sunspot)
逢星期一至三、五出版
Freddy係加勒比餐廳老闆嘅親戚，中學畢業後就過咗去委內瑞拉投靠開餐館嘅姨丈，一邊幫手一邊學習。數年前因為掛念香港嘅親人，返咗香港之後，就幫親戚手搞咗呢間南美燒烤餐廳。而因為Freddy喺南美住咗十幾年，深深體會南美嘅生活，更了解南美燒烤嘅風味特色，所以喺創作菜式同調味方面都畀咗唔少意見。
Freddy話南美當地嘅燒烤口味非常極端，而且因為當地夏天天氣極炎熱，為咗刺激胃口，味道一係勁酸一係勁辣，香港人可能會覺得味道較濃烈唔太啱食。所以加勒比餐廳大多數菜式都經過Freddy同大廚郭先生研究改良，採用南美地道調味料及調味方法，保留南美風味之餘，味道會調校得較溫和，惹味得嚟唔會太刺激，辣得嚟又唔太搶喉，令食客們更易接受。
齋睇樣以為同一般美式燒排骨差唔多，咁就錯喇！首先呢度全部燒烤食物都係用明火燒，比出面大多只用電爐烤嘅排骨更惹味香口，肉汁亦更豐富。另外採用嘅醃料亦好特別，包括啤酒、七喜、蜜瓜、橙汁、菠蘿汁等，令排骨帶有淡淡酸甜果香味。
正宗食法
喺墨西哥，食呢個燒豬仔背排會配埋墨西哥薄餅食，食法係先將一片薄餅中間撕開，放一片燒豬仔背排肉，加上墨西哥茄醬、番茄、青瓜夾喺薄餅內同食，咁就最正宗喇。
將生蝦放入拔蘭地內灌醉，再醃半日，先加上調味料用明火燒，所以蝦肉有超濃烈拔蘭地味道，蝦肉咬落爽口，酒香馥郁充滿口腔，不過唔嗜酒嘅就可能會覺得略為苦澀。
南瓜、甘笋等材料煲到溶晒，令到呢個加入老雞熬嘅南瓜湯味道好濃好香甜。
韜韜食評
「好香好滑，味道濃得嚟都算清，味道同賣相都好有特色。」
地址：元朗水車館街44號信發大廈地下11號舖
電話：24437827
營業時間：上午11時至晚上11時