陳曉東最新國語碟《PerfectLove》日內喺香港推出，佢好緊張隻碟，除請咗名攝影師夏永康以及造型顧問TomasChan幫手外，重搵埋夏永康發掘嘅靚女楊湘客串做封套女主角。
東東諗住一男一女梗係拍啲好有情侶feel嘅相啦，點知隻碟嘅概念原來係以唔同嘅傾斜角度代表唔同面貌嘅陳曉東。當日東東去到影樓，見到個斜台，就學鄭秀文口脗話：「嘩！好斜呀！」睇嚟好似幾好玩咁，東東企上去影相先知好耗腰力，影咗幾個鐘後，東東腰痠背痛，又叫助手幫忙按摩。
至於女主角楊湘，東東話見就見到，重着住tubetop性感登場㖭！不過佢哋就冇得卿卿我我囉，東東話：「唔緊要，我都同佢拍咗個MV啦，最緊要相靚嘛。」
而東東噚日接受港台訪問，講開最近佢經常被指夜蒲𠝹女，佢話：「𠵱家唔講𠝹，講yo㗎。我希望搵到個一見鍾情嘅女仔，不過如果我拍拖，唔會攞嚟談論。」
郭羨妮前日喺將軍澳電視廣播城拍攝《無名天使3D》，問到佢有冇考慮過同男友溫兆倫同居，佢話：「未結婚做乜要同居，我覺得冇咁嘅需要，佢成日都會嚟搵我。」郭羨妮重講笑話即使第時結婚，都會同媽咪一齊住，佢話：「咪嫁埋媽咪出去囉！」
中國文化部同韓國文化觀光部日前喺北京展覽館劇場舉辦「中韓抗非典音樂會」，中韓兩方面都派出強大陣容參與演出。韓國方面就有香港人熟識嘅Kang-Ta、文熙俊、BoA等。而中國方面，就派咗歌星韓紅、毛寧同滿江，佢哋落力演出，睇到現場觀眾拍爛手掌。
今屆候選港姐一直獲得張玉珊嘅纖體公司贊助瘦身，但7王從希前幾日被本報影到自費幫襯其他纖體公司。問港姐副統籌陳紫蓮，佢話：「成件事我了解過，佢未參選前都一直幫襯開呢間舖頭，但絕對唔係去做纖體同美容嘅嘢，所以冇牴觸，我都會同張玉珊嗰邊解釋。」
電影《大逃殺II》噚日上映，呢套戲有唔少血腥鏡頭，所以同三年前上映嘅第一集一樣列為三級電影。噚日開畫首場除咗捉到兩個男人喺場內盜錄，又發現十幾個唔夠十八歲嘅年輕人排隊入場。之前上映第一集已經有唔少未夠十八歲嘅人想入場，估唔到今次上映第二集都係咁。
