滙豐（005）升破百元大關，支持港股繼續上升，恒指收10374，升72點，成交仍高達120億元。
噚日大摩與德意志全日頂住滙豐，另有唔少對沖盤入市掃貨，滙豐升1.50元，收報100.50元，成交高達18.78億元。好友似乎想趁住美國保持低息期間，繼續在股市搵食。黑客話，未來半年，港股可能呈現單邊市上升，直至美國進入加息周期為止。阿虎突然記起10年前，即1993年第四季嘅大摩旋風，搞到港股翻天覆地，唔通大摩於10年後的第四季又捲土重來？不過，當時香港並冇負資產問題，但如今就有逾10萬個負資產。
中國製藥（1093）噚日停牌配股，據聞係大股東減持畀芬佬，所以冇貨流出街。今次大股東減持8000萬股，每股2.65元，套現逾2.1億元。如無意外，中藥今日將復牌，估計會炒到㷫烚烚。不過此股先前已炒得頗高，𠵱家跟炒嘅風險當然唔細，不過呢一浪主要炒中資股，可能唔需要太理性看待此股。
城市電訊（1137）旗下香港寬頻噚日推出收費電視，月費低至98元。城電股價未見大幅造好，收報2.625元，升0.96%。對手有線寬頻（1097）中期盈利倒退7%，此外亦冇公布以私有化來解決股份流通量問題，但股價仍然堅挺，升4.6%，收2.275元，成交1452萬元。國中控股（202）噚日好似做緊熱身運動，股價升3%，收報0.66元，成交102萬元。
阿虎