滙豐（005）再次晉身百元股，收市前兩分鐘，有人係咁買，扯到100.5元最高收，進帳1.5元。有大笨象頂住，恒指再升72點，收報10374，輕易再創今個升浪新高，成交雖減，仍有120億。
論搶鏡，新地（016）是日冠絕藍籌，大升3.5%，收49.9元。升輪榜上，亦以新地Call輪最威水，頭10大升幅窩輪佔咗6件。
恒指昨升72點，其中近67點由滙豐同新地貢獻。照個勢睇，呢兩件大藍籌有機會升多一兩蚊，先至調整，但係𠵱家至追買Call輪，恐怕水位唔係咁多。
祖國咁照顧香港，港股中長線可以睇好，但股市唔會直線上升，升得急就要調整吓，先至健康。港股近日升得急，大市如果再升，吼恒指升近10500水平，可以輕注博恒指Put輪，對象有9898同9855，都係12月尾到期，溢價冇縮得咁快。
不過，大市即使調整，幅度未必太大，恒指落到9800水平已有初步支持，到時又可以買番多少恒指Call輪。
對象暫時有兩件，就係9870同9894。兩件都係玩到年底，成交好活躍，唔怕轉唔到身。兩件比較，9870溢價同槓桿冇9894咁大，行使價又低啲，較為易玩。
章盛