被巨胸名模佐敦（Jordan）唱通街話自己破咗佢處男之身嘅英國口吃男歌手GarethGates，自從唔認又認失身畀佐敦成為頭條人物之後，一舉一動都受人注目。啱啱有新歌《Sunshine》派台嘅Gareth，最近又成為負面新聞人物，俾人踢爆佢個新MV狂抄JustinTimberlake。自言好享受做新聞人物嘅Gareth，唔通又想借Justin出位？
以「柱男」台風而聞名嘅Gareth，今次喺新MV《Sunshine》度一改作風，同女主角大跳辣身舞，不過有人話Gareth個MV同Justin嘅《Senorita》MV有八、九成相似，例如女主角都係個拉丁索女，而且重一樣不時大跳貼身勁舞，連舞步都同出一轍咁話喎！
另外，Gareth嘅MV無論燈光以至鏡頭擺位都抄到十足，好似有一幕Justin同女主角喺牆角度調情，又或者Justin摸女主角屁股嘅鏡頭，Gareth都喺自己個MV老翻同樣嘅場面。雖然話勁歌熱舞呢招啲女fans幾時都咁buy，不過抄到好似倒模咁一模一樣，連我羅拉都覺得幾肉酸囉！