爆機狂迷：
千呼萬喚《TOD2》中文化登場唔靠攻略好玩10倍

近年可算係PS2遊戲中文化嘅高峯期，不過早期大多屬一啲動作智力類，中文化幫助不大，到上月推出嘅《櫻花大戰》才算真正打開中文化之門。而一直只聞樓梯響嘅《TOD2》中文版（命運傳說2）亦正式登場，全故事、介面統統係你我認識嘅中文，絕對係華人機迷夢寐以求嘅中文RPG。

記者、攝影：徐影龍
逢星期一至三、五出版

遊戲類型：RPG
對應機種：PS2
遊玩人數：1至4人
售價：$285
開發商：NAMCOLIMITED

「透鏡」到底係乜？
上年日版《TOD2》推出時，口碑同銷量都相當不俗，好多機迷追睇《GameWave》連載嘅小說式攻略，今日就專誠請嚟當日負責撰寫嘅夜行雲，睇吓中文版繙譯得夠唔夠水準。
夜行雲：「當初負責小說式攻略時，已知道將會出中文版，所以好有壓力，盡量譯得接近原意之餘又保持生鬼。試玩中文版，發覺台灣譯得好有水準，上文接下理十分通順，之前嘅漢字名稱都有保留，如招式名、事件等，機迷肯定100%投入。較為搞笑係遊戲中極重要之物件，台灣譯做「透鏡」，起初令我摸不着頭腦，後來先知即係我譯嘅「晶石」。總括嚟講，繙譯水準我畀90分，期望嚟緊會有更多RPG大作中文化。

當初《TOD2》宣布推出中文版時，好多機迷都寧願忍吓手，等中文版出先玩，網上更有機迷表示，日文版爆機三次仍會買中文版玩，可想而知《TOD2》魅力有幾高。今次中文化後，不但令機迷更易明瞭劇情推進、完成事件，而且其極為複雜嘅菜單、合成系統都較易消化，唔使一味盲摸摸跟攻略玩。
筆者試玩半日，發覺進度比過往慢得多，主因係逐句對白都會慢慢睇，唔似以前咁不斷「飛」對話，雖然所花時間多咗，不過趣味提升豈止十倍，可以真正享受到RPG嘅樂趣。最後一讚係動畫播片冇改到普通話配音，以中文字幕代替，原版嘅味道得以保留。

故事精采戰鬥刺激
《TOD2》成功在於故事出色、世界觀宏大，除主幹除魔情節外，亦經常發生有趣枝節，一眾主角生鬼之餘，重可表露溫馨感人嘅一面，更為有血有肉，中文化後相信令《TalesOf～》系列增加唔少Fans。
睇番《FF8》嘅口碑，已知戰鬥系統絕對可影響一隻RPG嘅成敗，幸好《TOD2》呢方面非常出色。雖非首款引入格鬥概念嘅RPG，不過系統實在做得唔錯，同伴合力連斬做出多Hit數效果，若以分插器四人同玩，更可達到100Hit之譜！爽快度攞滿分，儲經驗值都冇咁悶。