全港首個長者屋將軍澳樂頤居，以現樓方式推出，發展商房協主席鍾瑞明噚日向傳媒同專欄作家，推介呢個新概念物業。
樂頤居喺將軍澳培成里，鄰近東港城同地鐵坑口站，生活起居十分方便，部份單位重可以望到西貢銀線灣㖭。房協高級經理許鴻傑講，之前有名區議員街坊嚟參觀，指住對面個島話係「靈龜入海」格局，話樂頤居風水好好，重好過佢屋企喎。
樂頤居係以出售租住權方式，畀六十歲或以上，資產一百萬以上嘅長者申請，一次過付款金最平二十幾萬，最貴都係五十零萬，就可以住到終老，至交番間屋畀房協。蘭西同事睇完示範單位相片，都有啲心動，問有冇預訂。
香港人口老化，已開始引起社會關注，房協率先搞長者屋，有助紓緩呢個問題。至於私人發展商太古就申請將薄扶林狗房轉做長者屋，另新地也曾表示，有意起長者屋。
何文田新一代豪宅君頤峰，吸引唔少城中人士慕名參觀。藝人陳松伶噚日中午就去咗睇示範單位，重睇得好仔細，睇完單位裝修，又喺個物業模型前研究一番。上前一問之下，佢話𠵱家住西貢，諗住換樓，近嚟四周圍睇樓。問佢會唔會揀市區樓，陳松伶就話重要睇睇。此外，地產界出名「拿手」賣豪宅嘅新地雷霆，噚日傍晚都去君頤峰售樓處觀摩。
過去喺香港地，識英文就有着數，回歸之後，就要識埋普通話至掂，利嘉閣沙田第一城分行經理鄭雄雯話，加入該行一年嘅代理楊磊暉能操一口流利普通話，所以促成唔少內地客嘅租務成交。
好似應用科技研究院聘請嘅一名江西省僱員，透過楊磊暉租咗第40座中高層C室，410方呎，全包月租四千蚊。中國鐵路總公司調嚟香港嘅一名浙江省員工，就租住43座高層H室，410方呎，全包月租四千二蚊。
楊磊暉原來喺台灣住過三四年，重喺當地做過記者，唔怪得啲普通話咁流利啦！聽講佢啲英文都好好㖭。
長實賣樓花樣多多，每次都會費盡心思務求搞出氣氛。噚日凱帆軒記者會，目的係宣布加推單位，內容冇乜新意，話咁快就講完，不過高級營業經理黃思聰就特意製造「新聞」，增加見報機會。
話說黃思聰喺記者面前炸「爛」個示範單位，以行動話畀大家聽，呢類對流窗單位已經賣晒，索性炸咗佢。佢喺示範單位門口，按動遙控制，一聲巨響之後，現場滿布濃煙，一張寫住大功告成嘅橫額隨之彈出。
另外，香港置業為長實畢架山一號二期搞誓師會，請咗位嚟自倫敦聖三一學院鋼琴演奏級文憑畢業嘅靚女，現場演奏兩曲，寓意畢山會所設有演奏廳。
由英資怡富基金持有嘅山頂和福道六座洋房，已經賣咗五間，個價都幾靚。原來上市公司毅力工業大股東林文燦同丁麗玲，都係買家之一。
佢哋透過忠毅有限公司，喺上個月11號，用2508萬，買咗二十六號洋房，連花園同車位。洋房面積約三千三百方呎，呎價七千六百蚊。
林文燦同丁麗玲買咗大屋之後，就沽出部份毅力股票，套現約九千萬，睇嚟重可以買多幾間大屋喎。
蘭西
電郵地址：
