鄭中基（Ronald）與鄧麗欣（Stephy）日前相約到香港氣槍射擊會玩氣槍，已考獲槍牌多年的Ronald，更以專家姿態教導Stephy如何瞄準目標，而Stephy的技術果然大有改善；不過，Stephy就笑指不覺得Ronald揸槍有型，而是很搞笑。
鄭中基與鄧麗欣在電影《龍咁威2003》中皆飾演警察，拍攝時少不免有揸槍場面，而原來Ronald自小喜歡射擊，還擁有南加州的槍牌，為一過手癮，他日前相約女主角Stephy一同到射擊場玩槍。由於Stephy是玩槍生手，故Ronald首先教她要用雙手圍成一個小三角形，接着拉近至左眼，這樣練習就可以瞄準紙靶的中心位置。由於Stephy聽教聽話，她的槍法果然較之前準，且能射中紙靶的中心點。
Ronald說：「成套戲我都冇得開槍，反而成日俾人用支槍指住我個頭，其實我好想下一部戲可以有多啲開槍場面，咁我就可以一顯身手啦。」Ronald一邊展示於南加州所考獲的槍牌，一邊說：「我十幾歲嗰時就已經好鍾意玩槍，一成年就即刻去考槍牌，當時除咗要考筆試之外重要考射擊，六百分滿分，我攞咗五百九十二分。」
此外，Ronald表示自己有收集手槍的嗜好，他說：「真槍同氣槍夾埋有三十幾把啦，不過所有真槍都喺美國，我一有時間都會去拆開啲槍抹吓，我覺得好有成功感。」
而Stephy在開槍時，就顯得頗為驚慌，她笑說：「我唔識點玩嘛，好彩有Ronald教我點樣瞄準，之後先射得準啲咋，不過Ronald揸槍個樣都係好搞笑，我一啲都唔覺得佢好型呀。」
採訪：李珮洳 攝影：陳志嵐
場地提供：香港氣槍射擊會 化妝：KrisWong,YanLai
髮型：HermanLee,HoraceTse（Chin.G）
