正當外間擔心香港嘅立法會議員會被台獨分子利用之際，劉慧卿噚日已經正式展開訪台活動。頭兩日佢先同啲舊相識見面，包括黎昌意、鄭安國同葉金鳳，重去咗國民黨嘅國家政策研究基金會參觀。卿姐話，嗰度主要係在野黨嘅研究總部，用嚟keep住班舊政務官，鄭安國佢哋都喺度做嘢。跟住佢又去咗立法會聽公聽會，同國民黨籍立委陳學聖見面。
唔講唔知，陸委會主任蔡英文原來係卿姐喺倫敦大學嘅舊同學，兩人重逢，梗係要拍照留念。卿姐今日行程更密，早上見台北市市長馬英九，跟住見李登輝，重會見埋新黨同親民黨，佢話「今次乜黨都見齊」。
至於今日趕赴台嘅涂謹申就話冇有怕，佢話去邊都會照講，而為咗出席今次研討會，已經準備咗一篇二萬字嘅論文，從法律角度分析二十三條對「一國兩制」實踐嘅影響。
（圖）劉慧卿在台灣遇上舊友蔡英文（右）拍照留念。
傳真︰2623-9278
電郵︰