喺銅鑼灣「星巴克」咖啡巧遇新晉潮界經紀人「大隻標」，佢喺潮界、演藝界甚吃得開，有唔少八卦好料。今次「大隻標」就邊歎咖啡、邊爆好料。「大隻標」話：「最近有位新冒起嘅水貨老闆賴咗鑊大嘅，聽講佢入咗隻台灣『波打』袋返嚟當正貨賣，重喺銅鑼灣個高級場開咗間專門店，淨係裝修都使咗幾十萬，又喺雜誌賣晒廣告，當正係香港總代理咁做。好多行內人見到都打個突，問嗰位水貨老闆為乜咁博？唔通當海關冇到？」講起呢個「波打」袋，喺香港同日本出晒名，一個腰包仔都賣過千銀，但仍賣斷巿。正版袋全部喺日本做，連啲料都自己生產。台灣佬一見到，立即索性照抄，由商標以至成個袋設計，甚至個名都100%抄足而且售價平成半。不過日本正版叫「波打東京．日本」，而台灣嗰個就叫「波打．國際」，喺台灣註冊咗，當地好多大百貨都有專櫃。日本仔郁佢唔到，但已被激爆。點知今次竟被水貨新貴引入嚟香港當正版賣。「大隻標」話：「其實都唔關個老闆事，可能係個中間人冇搞清楚商標版權問題，令老闆踩到蕉皮。聽講話嗰位老闆重以為呢隻台灣『波打』係正貨，執到筍嘢。而𠵱家正諗計點樣拆掂佢。」
文：大食Jack