阿松人離開咗政府，但重有唔少新聞，包括搬新居同埋有冇新就，當然佢搬屋時將啲重要文件亂放就更惹人關注。
阿松嘅老友同八方講，最近有啲報道唔係幾準確。首先阿松同伏明霞唔會搬去西半山寶珊道一號住，田少都可以證實，因為呢個盤係田少同郭氏兄弟發展嘅；其實阿松會搬返去淺水灣道四十一號豪宅南山別墅住就真。呢度都住咗好多名人，好似陳四萬媽咪同成龍。
其次，阿松唔認嗰啲所謂危機方案係佢嘅傑作。有行家呢幾日喺財司府邸搵到嘅留下文件原來唔係阿松寫嘅，咁係邊個寫嘅呢？佢老友話連阿松自己都唔知道，真係耐人尋味。
講真，文件中嘅英文認真錯漏百出，有識阿松嘅人一睇就話唔似佢嘅筆迹。
點都好，八方聽聞，雖然董特首冇好似挺葉劉咁公開支持阿松，但佢兩個人重有互通消息。文件中指特首好信佢，呢個肯定係事實，阿松喺7.1前以為自己已經冇事亦係真嘅。
傳真︰2623-9278
電郵︰