早排工業股炒到飛起，新確科技（1063）係其中一隻，噚日停牌公布搞配股。小初一早預咗隻股有呢一招，但奇怪就係，唔聽聞有經紀叫人攞貨，配股一事似乎收得好埋。
經紀黃話，新確今次先舊後新配股，配股價定在1元樓下，集資金額唔算大，只係三幾千萬銀，由於Size唔大，好似話幾個芬佬已經搞掂晒，唔使勞煩散戶，所以小初先至收唔到風。
雖然話就話集資金額Size細，但睇番新確股價，在短短幾個月內，由0.40元一條氣炒上1元樓上，家陣如果喺1元附近配股，計落其實唔算平，但既然有人肯要貨，公司又冇理由唔收錢。
經紀黃又話，今次搞配股嘅經紀行，今年以來先後為多隻工業股搞過配股，其中最令人回味，首推黛麗斯（333），按佢哋往績表現，叫做售後服務幾好，估計新確配完股後，股價應該有支持。聽聞佢哋下一隻要搞作嘅股份，就係廣興國際（1131），隻股噚日升10%，收1.42元。廣興股價異動，估計有動作跟尾。
慕容小初