外滙C呢幾日心情好靚，飲茶爭住畀錢，重係畀得好開心嗰種。賓架陳問佢係唔係睇皇馬碰到碧咸兼握埋手，外滙C話：「唔係，上星期三碧咸一到達Dragon-I，我就收到風，知道好多靚女模特兒落去，但我諗住太多人喺度，費事落去逼，況且我鍾意賭馬，賭波唔熟行，對皇馬冇乜大興趣。」咁點解如此開心，外滙Ｃ話：「大仔入咗南加州大學！」
經佢一講，先至醒起兩年前呢個時候，外滙C位公子會考得十九分，返唔到灣仔間著名男校讀中六，十分冇癮，問計於左丁山，立即醒佢一條橋，就係去Foothill讀副學士，話咁快過咗兩年，佢位公子好生性，夠勤力，讀得唔錯，由Foothill轉去讀USC，唔怪得外滙C成個人鬆晒，比兩年前嗰鋪緊張法，有天淵之別。
問外滙C：「使唔使買架Benz畀佢？」外滙C話：「我個仔識得慳嘅。佢話買架福士就OK咯喎。」USC有錢學生甚多，來自亞洲地區如印尼、菲律賓嘅，更加富有，唔少學生揸Benz、BMW返學，外滙C個仔肯揸福士算數，連外滙C話買架Audi都唔要，算係乖咯。
外滙C開心到連個仔讀邊科，係唔係轉去USC讀三年級，都唔知得清楚，算係儍人有儍福。有時苦心經營，樣樣昅到實，都未必收到預期效果。外滙C採取放任政策，信任仔大仔世界，佢自己會搞掂嗰一套，樂得輕鬆自然。成班老友見外滙C咁開心，一於大擦一頓，連陸羽嘅廚師亦好似有感應，一碟豉椒蝦球麵竟然創下罕見嘅高水準。