日本年年有新人上位，論今年上位上得最快嘅女星，有長谷川京子同片瀨那奈，而片瀨比起長谷川優勝嘅地方，係佢瓣數夠多，除咗近排已被封為新廣告女王之外，佢又泊到專用銀彈宣傳攻勢捧啲好公式化偶像嘅avex唱片公司，向歌壇進發，咁啱片瀨又出埋性感寫真，實行要令到fans大出血！
好鬼可愛嘅片瀨話，今次本寫真因為係由女攝影師更井真里操刀，所以佢對住鏡頭拍寫真嘅時候，可以好放心咁搔首弄姿，表現得好自然，甚至可以去得更大膽啲喎！
片瀨那奈本寫真集叫《N》，據聞成本嘢都係響鹿兒島附近嘅屋久島取景，我羅拉見到片瀨着住啲質地又薄又輕嘅裙，喺島嘅海邊同埋千年老樹下影寫真，真係唔止性感誘人，重多咗一份一般波妹拍寫真嗰陣所欠缺嘅靈氣。
做得現今迷死唔少少男同叔叔嘅日本新星，片瀨唔似一般水着女星咁，靠着住啲少布嘅比堅尼，擺啲騎呢動作嚟取勝。佢一身與別不同嘅氣質唔係個個女星都可以擁有，好似佢着住件鮮紅色嘅內衣，喺浴缸入面沖花花浴，真係令人覺得充滿咗視覺享受，證明咗唔一定要着水着先掂嘅！