碧咸離開曼聯轉投皇馬之後，球迷最關心嘅，就係佢件7號球衣會由邊個球員嚟着，𠵱家終於有答案，就係新加盟嘅基斯坦奴。
今年得嗰十八歲嘅基斯坦奴，個名雖然冇碧咸咁響，但就被認為葡萄牙「黃金一代」嘅接班人之一，技術應該有番咁上下，加上都生得幾靚仔，所以曼聯亦向佢委以重任，塑造佢成為「紅魔新7號」。而計我求大俠話，曼聯咁急搵碧咸接班人，無非係驚喺亞洲嘅地盤俾皇馬食咗。
曼聯冇咗碧咸唔太影響佢哋喺歐洲嘅生意，但削弱咗喺亞洲嘅競爭能力。皇馬喺簽咗碧咸後，喺亞洲愈嚟愈受歡迎，聲勢重直迫曼聯，曼聯重唔嗱嗱臨諗計咩。睇番曼聯之前幾個7號仔好似佐治貝斯、笠臣、簡東拿及碧咸，個個都好成功，故我求大俠亦睇好呢個後生仔。
拜仁新將馬卡爾喺前晚贏紐倫堡二比○場友賽新登場，重同盛傳因佢加盟而會冇正選嘅艾巴合作；艾巴喺之前兩場聯賽冇乜表現，但喺呢仗就好醒神，重入咗一球，反而馬卡爾就冇波入。雖則話馬卡爾肯定係正選，但只要艾巴保持水準，我求大俠唔信佢冇落場機會。
李鐵完成轉會愛華頓交易，但可唔可以保持上季咁多上陣機會，睇佢表現之外，重要同隊友爭位，尤其領隊莫耶斯好想簽富咸中場桑恩戴維斯，如果成事，中場兵源又多一人，所以我求大俠覺得萬一「鐵子」爭唔贏正選位，呢三年都幾難過。
漢堡前鋒羅美奧幾日前同佢兩歲大嘅女玩，好衰唔衰整親條腰，唔知踢唔踢到禮拜日對禾夫斯堡場德甲聯。我求大俠經常提醒啲球員小心家居意外，記得西班牙門將簡尼沙利斯就因畀鬚後水樽整親隻腳，搞到連世界盃都踢唔到；如果羅美奧要長「唞」，你話幾唔抵呢！
面對強姦控罪嘅NBA球星拜恩近排當務之急，梗係冧番老婆，畢竟唔認強姦都認咗通姦。繼早排買咗隻價值成三千萬港元嘅鑽戒後，近日又俾人發現佢帶雲妮莎到洛杉磯嘅迪士尼樂園玩。睇嚟拜恩呢招除咗要為不忠向老婆補鑊之外，重要重建自己嘅好丈夫形象㖭。